https://2img.net/r/ihimizer/img125/599/72822033.jpg (http://img125.imageshack.us/my.php?image=72822033.jpg)
Herpesi gjenital është një sëmundje seksualisht e transmetueshme mjaft e shpeshtë. Mjekët tërheqin vëmendjen të trajtohet në kohë, sepse sëmundja mund të bëhet kronike dhe të shkaktojë ndërlikime serioze.
Çfarë është herpesi gjenital?
Ky është një lloj infeksioni që transmetohet në rrugë seksuale. Numri i bartësve me herpes gjenital po rritet nga viti në vit. Llogaritet se raporti i kësaj sëmundjeje është 1 me 4 me gonokokët. Vlen të theksohet se herpesi gjenital shoqërohet me një sërë sëmundjesh të tjera si: trikomonas, klamida, sifiliz, gonokokët, kandida.
Nga se shkaktohet?
Shkaktari është herpes virus simplex (HSR) që përmbledh HSr1 dhe HSr2, herpezoster, virusin pseudorobik. Në përgjithësi HSr2 është shkaktari i herpesit gjenital dhe anal, kurse HRs1 prek kryesisht mukozat bukale (të gojës).
Si shfaqet sëmundja?
Periudha e inkubacionit është 3-20 ditë dhe fillimisht shfaqet me prurit (të kruara), djegie dhe dhimbje. Brenda disa ditësh shfaqet vezikat (puçrra të vogla), që paraqiten të vogla sa një kokë gjilpëre të grupuara me likid në fillim transparentë dhe më vonë bëhet me qelb. Këto zëvendësohen me kore dhe në fund me ndryshim të ngjyrës në vendin ku shfaqet dëmtimi (pigmentacion).
Si shfaqet herpesi gjenital i tipit 2?
Ky lloj herpesi shfaqet ndryshe te meshkujt dhe te femrat. Kështu te meshkujt preken kryesisht mukozat e glandulës. Kur herpesi prek uretrën, mashkulli ndjen dhimbje të ngjashme të gonorresë, gjatë aktit seksual. Ndërsa te femrat lezionet (dëmtimet) janë në mukozat e labilave të mëdha dhe të vogla në regjionin anal dhe vaginë, në qafën e uterusit. Mukoza është e kuqe, fillojnë erozionet, ulçeracionet dhe fisurat. Zgjatja mesatare e eliminimit të virusit që nga shfaqja e lezioneve deri në kulturën e fundit pozitive është rreth 11 ditë. Në 30% të rasteve ka dhe shenja me edemapati inguinale (zmadhim i gjëndrave në fund të barkut). Në 2-3% të rasteve mund të shoqërohet me shenja meningiale, dhimbje koke, fotofobi (mosdurim i dritës), rigititet të qafës (ngurtësim të qafës).
Po herpesi tip 1 si shfaqet?
Infeksioni primar ndodh te fëmijët në 60% të rasteve me formë të fshehtë, paraqitet me puçrra në zonën e hundës, mishrave të dhëmbëve dhe me temperaturë të lartë deri në 40 gradë. Kjo formë zakonisht shërohet pa trajtim brenda 7-12 ditësh.
Ndodh që herpesi të përsëritet?
Rreth 2/3 e të sëmurëve që shfaqin primo infeksion gjenital shërohen pa u mjekuar, kurse pjesa tjetër vazhdojnë të jenë mbartës të virusit në organizëm. Këto raste përfundojnë të bëhen kronikë. Shpesh diagnoza vështirësohet pasi herpesi gjenital shoqërohet me infeksion dytësor.
Herpesi gjenital mund të shfaqet gjatë shtatzënisë
Herpesi gjenital është i shpeshtë te gratë shtatzëna. Pjesa më e madh e infeksioneve intrauterine çojnë në vdekje të fetusit. Rreziku i transmetimit të sëmundjes nga nëna e sëmurë te fëmija gjatë lindjes në rrugë natyrale është 50%.
Si mund të diagnostikohet sëmundja?
Në shumicën e rasteve diagnoza klinike është e qartë dhe konfirmohet nga ekzaminimi direkt i rezultateve. Në rastet pa simptoma klinike mund të nevojitet diagnostikimi etiologjik.
